Parsore dai palcs di Suns Europe
a rivin i sunôrs di Gales e Sardegne
Apontament dopli cun Mauro Palmas e Francesco Medda e cun Carwyn Ellis, un dai colòs dal indie pop-rock dal Ream Unît
FRIÛL – Si daran la volte parsore di nuie di mancul che cuatri palcs furlans i sarts Mauro Palmas e Francesco Medda e il galês Carwyn Ellis! Suns Europe – il festival des arts in lenghe minorizade – inmaneât de cooperative Informazione Friulana, editore di Radio Onde Furlane, cu la poie finanziarie de Regjon Autonome Friûl-Vignesie Julie, de ARLeF – Agjenzie Regjonâl pe Lenghe Furlane, dal Comun di Udin, de Fondazion Friuli e cu la colaborazion dal Istitût Basc Etxepare e di cetancj altris sogjets publics e privâts, internazionâi e di chenti – al va indevant intal so tour estîf movintsi a Murùs, Dartigne, Cormons e Puçui!
AI 7 E AI 9 DI LUI, I SARTS PALMAS E MEDDA – Ai 7 di Lui, a 9 di sere, Mauro Palmas e Francesco Medda – cul lôr progjet discografic Meigama – a saran in conciert li dal Fuart di Sante Maragarite (Murùs): cheste “cubie scalembre” e je une des novitâts plui esplosivis de sene musicâl sarde, simpri siore di produzions. Mauro Palmas, virtuôs dai struments a cuarde, al è aromai une istituzion de musiche tradizionâl de isule, biel che il compositôr eletronic Frantziscu Medda al incjarne la bande plui inovative. Paisaçs sonôrs eletroacustics piturâts cun grant gust e cuntune cure maniacâl pai detais. A saran simpri lôr a esibîsi ai 9 di Lui, a 9 di sere, li de aziede agricule Gradnik di Cormons, ma ta cheste ocasion a montaran parsore dal palc adun cui furlans Franco Giordani e Davide Tomasetig, intune serade di musiche dal sigûr di no pierdi!
AI 8 E AI 10 DI LUI, IL GALÊS ELLIS – Ai 8 e ai 10 di Lui, simpri a 9 di sere, i tocjarà a Carwyn Ellis. Il produtôr e polistrumentist galês al menarà la sô musiche prime sul Cuel di Sant Martin, a Dartigne (se al plûf, intal Teatri Lavaroni), po dopo alì de Cort de Cjase de Musiche di Puçui (dentri se al plûf). Ellis al è un dai colòs dal indie pop-rock dal Ream Unît. No cate lis sôs colaborazions di gale cun artiscj innomenâts, tant che Pretenders, Oasis, Saint Etienne… chest artist braurôs nol à mai molât di scrivi cjançons inte sô lenghe mari adun cul so grup Colorama. La sô grande passion pes armoniis e pes melodiis dal Brasîl e je finide che nol è tant intal progjet Carwyn Ellis and Rio, cuntun incrosament gnûf tra ritmis latins e lenghe galese.
SUNS EUROPE – Suns Europe (di Jugn a Novembar dal 2022) al è il festival european des arts performativis in lenghe minorizade (tiermin che al marche dutis chês lenghis che ur ven dineade la pussibilitât di jessi dopradis in cualsisei ambit de vite di ducj i dîs in maniere normâl e al stes nivel di une altre lenghe). Nassût intal 2009 in Friûl, cûr multilengâl de Europe, Suns al jere un concors musicâl pes comunitâts minoritariis de Europe di aree alpine e mediteranie. Daspò il festival al è mudât in Suns Europe, un lûc di incuintri e di scambi tra artiscj di grups linguistics minoritaris dal continent e une ocasion par dutis lis comunitâts europeanis di cjapâ cussience dai propris dirits linguistics e ancje de impuartance dal pluralisim culturâl tant che patrimoni, dirit e oportunitât par ducj, in Friûl e no dome. Il Festival al è organizât de Cooperative Informazione Friulana, editore di Radio Onde Furlane, cu la poie finanziarie de Regjon
Autonome Friûl-Vignesie Julie, de ARLeF – Agjenzie Regjonâl pe Lenghe Furlane, dal Comun di Udin, de Fondazion Friuli e cul contribût dal Istitût Basc Etxepare, des associazions Amîs de Mont Quarine e Damatrà, dal CEC Centri Espressions Cinematografichis. Cun di plui, si zove de colaborazion di cetancj sogjets publics e privâts, tant che i Comuns di Dartigne, Mortean, Murùs, Puçui e Romans dal Lusinç, la associazion “Amici del Teatro” di Dartigne, la Societât Filarmoniche di Puçui, il Liberatori di Art “Fulvio Zonch” di Romans dal Lusinç, il circul Cas*Aupa di Udin e lis associazions Inniò, Babel (Sardegne) e Stichting REUR (Basse Sassonie). Suns Europe al à savût trasformâ il Friûl intune crosere di culturis, lenghis e artiscj, creant contaminazion e confront e lassant spazi a une produzion artistiche di valôr assolût.
Dut il program e lis informazions si ju cjate su www.sunseurope.com e te pagjine Facebook | Instagram |
I APONTAMENTS ESTÎFS DI SUNS EUROPE 2022 (ducj a jentrade libare)
ai 7 di Lui, a 9 di sere
Mauro Palmas e Francesco Medda – Meigama (Sardegne) – conciert
Fuart di Sante Margarite, Murùs
ai 8 di Lui, a 9 di sere
Carwyn Ellis (Gales) – conciert
Cuel di Sant Martin, Dartigne (tal câs di ploie Teatri Lavaroni)
ai 9 di Lui, a 9 di sere
Mauro Palmas e Francesco Medda – Meigama (Sardegne) + Franco Giordani e Davide Tomasetig (Friûl)
Aziende agricule Gradnik, Cormons
ai 10 di Lui, a 9 di sere
Carwyn Ellis (Gales) – conciert
Cort de Cjase de Musiche di Puçui (dentri tal câs di ploie)
ai 13 di Lui, a 6 sot sere
«Bestaldean» cun Jaione Dorai e Ernesto Prat (Paîs Basc) – presentazion
Librarie Tarantola, Udin
ai 14 di Lui, a 9 di sere
Sara Zozaya (Paîs Basc) – conciert
Cort de biblioteche, Romans dal Lusinç
ai 15 di Lui, a 9 di sere
Sara Zozaya (Paîs Basc) + Cjançons dal Cormôr (Friûl) – conciert
Place Libertà, Udin (Teatri “San Giorgio” tal câs di ploie)
